Iomete pri la kontaktoj kun internacia ILEI

2005-dec

ILEI decidis en novembro 2005 ke la kongrestemo 2006 estu: ”Lingvaj rajtoj, lingvolernado kaj eduko por ĉiuj”. De ĉirkaŭ 20 sekcioj venis tradukoj en ĉies nacian lingvon. Legu pli en www.ilei.info/vikio/Konferenca_Temo
Respondo al la peto de Mihai Trifoi, sekciestro en rumana ILEI, pri la argumentoj de la petskribo de la sveda sekcio de ILEI al la ministro pri Egaleco en aŭgusto 2005

Argumentoj:

Malgraŭ la fakto ke pli kaj pli da lingvoj estas uzataj en EU la plejparto de la lernantoj studas nur la anglan, devige por ĉiuj. Ni volas grandigi la intereson ĉe gimnazianoj por lingva egaleco.
(La poenta sistemo por eniri universitatojn bedaŭrinde ne favoras lingvojn sed pli rapidajn mallongajn kursojn. Estas diskuto pri tio. La instruistoj pri lingvoj trovas, ke iliaj instruhoroj daŭre malkreskas.)
Nun estas Esperanta kurso en la universitato de Umeå. Oni devas komenci la studadon jam en la gimnazioj.
Esperantoinstruistoj troviĝas dise en la lando.
La Homaj Rajtoj de UN artikolo 26:2 diras: ”Eduko celu la plenan disvolvon de la homa personeco kaj plifortigon de la respekto al la homaj rajtoj kaj fundamentaj liberecoj. Ĝi kreskigu komprenon, toleron kaj amikecon inter ĉiuj nacioj, rasoj aŭ religiaj grupoj, kaj antaŭenigu la agadon de Unuiĝintaj Nacioj por konservo de paco.”

Aldonitaj: la statuto de la sveda sekcio de ILEI kaj la Pragmanifesto.

La projekto (mallongigite)
Nomo: Lingva egaleco – esperanta projekto por gimnazioj
Projektposedanto: La estraro de la sveda sekcio de ILEI
Kion ni volas fari:

Informi pri Esperanto en kiel eble plej multaj gimnazioj.
Esekonkurso (svede) inter la gimnazioj: ”Lingva egaleco”.
Eldono de libro kun la plej bonaj eseoj, tradukitaj en Esperanton. Paralelaj tekstoj svede – esperante. Kune kun la bonega lernolibro EPoGo (Esperanto por gimnazianoj) la gimnazianoj povas legi ĝin dum la dua studsezono.
Instigi gimnaziajn instruistojn lerni Esperanton.

UNUA PERIODO: Printempo 2006

Kontaktoj kun rektoroj kaj instruistoj pri la sveda
Informlecionoj al gimnazianoj kaj instruistoj, pri Esperanto kaj pri la esekonkurso
Informo al rektoroj pri nia ebleco instrui al grupoj kiuj elektus Esperanton kiel libere elektitan fakon
Informo pri nia ebleco eduki gimnaziajn instruistojn en esperantoinstruistojn
Kontaktoj kun la du svedaj esperantaj eldonejoj kaj aliaj eldonejoj

DUA PERIODO: Septembro – decembro 2006

”Ileanoj” kaj aliaj E-instruistoj vizitas la gimnaziojn, prefere kune kun iu junulo, kiu havas propran sperton de ”Esperanto kiel libere elektitan fakon” aŭ kiu vojaĝis per helpo de Pasporta Servo
La gimnazianoj ricevos broŝurojn pri Esperanto kaj la instruistoj havos la regulojn por la esekonkurso
La estraro de la sekcio havos longan kunsidon por diskuti la eseojn kaj dividos la plej bonajn inter si por traduko

TRIA PERIODO: Januari – majo 2007

Novaj vizitoj al la klasoj. Montro de provekzempleroj de la libro. Renkonto kun personoj kiuj espereble volos studi Esperanton
Elekto de eldonejo

KVARA PERIODO: Junio – oktobro 2007

Presado de la libro. Dissendo al la gajnintoj kaj al UEA (senkoste), al gimnazioj, E-kluboj (laŭ antaŭa mendo)
Dusemajna eduko de instruistoj en Esperantogården, Lesjöfors
La aŭtuna studsemajno: Esperanto kiel libere elektita fako
En kelkaj gimnazioj: eduko de instruistoj en Esperanto

KVINA PERIODO: Oktobro – decembro 2007

Labortaksado
Artikoloj en E-revuoj, revuoj por instruistoj kaj en ĉiutagaj gazetoj

Kio okazis ĝis nun al la petskribo, unue sendita en aŭgusto?

La oficejo de la ministro pri egaleco plusendis la petskribon al Näringsdepartementet (la Industria Departemento) ĉar ja temas pri mono.
Du sekcioj en Näringsdepartementet traktis la aferon, sed trovis ke ĝi ne estu ilia respondeco.
Oficisto telefonis kaj proponis ke ni sendu la petskribon al Invandrarvedrket (la migrula buroo), ĉar tie troviĝas mono. Ni protestis: ne estas enmigrado, sed afero pri egaleco. Alia propono: sendu la petskribon al Utbildningsdepartementet! (la departemento pri edukado). – Pli bone, sed ni persistas: temas pri egaleco.
Alvenis leteron de Näringsdepartementet, dirante: – Ni plusendis vian petskribon al Utbildnings- och kulturdepartementet.

Tia estas la nuna situacio en novembro 2005.

Interese: En oktobro parlamentano kreis proponon pri Esperanto en la lernejoj ekde la sepa klaso (13-jaruloj) kaj en la gimnazioj. Do Utbildningsdepartementet esploros du priesperantajn skribojn samtempe. Iam en malfrua printempo la parlamento traktos la proponon. Nia petskribo estas plej simpla kaj ni devus havi respondon en januaro – februaro, mi imagas.

Fino de la sendita respondo.

Bone havi kunlaboron kun aliaj sekcioj de ILEI kaj kompreneble ankaŭ kun la svedaj esperantoorganizoj.

Siv Burell